نكت بخلاء

مستعدين ؟؟
ياللا نبدأ

بخيل قامت فى بيته حريقة عمل ميسد كول للمطافى

بخيل اتجوز راح يقضى شهر العسل لوحده

بخيل راح يخطب لابنه قال له : خللى بالك ، دى ليك ولاخواتك

بخيل بيتمشى مع عروسته قالت له ممكن نشرب حاجة ، أخدها وجاب لها ميه من كولدير مسجد

بخيل راح يزور واحد بالمستشفى لقى الباب مكتوب عليه " ادفع " قال خلاص ازوره لما يرجع البيت

بخيل اشترى نص كيلو برتقال " 3 برتقالات " بياكل الولى طلعت بايظة ، التانية بايظة ، طفى النور وأكل التالتة

بخيل بيموت قال لو ولاده لو مت النهاردة ماتغسلونيش ، لسه واخد حمام امبارح

بخيل بيموت نادى على ولاده يا محمد ، يا على ، يا صالح ردوا كلهم احنا جنبك يا بابا ، قال لهم كلكم هنا وسايبين نور الصالة والع

بخيل دخل على ولاده نايمين قال لهم بقى انتم 3 ومشغلين المروحة على 4

بخيل قال لولاده اللى هاينجح منكم هافرجه على عربية الآيس كريم

بخيل رايح البقالة ومعاه ابنه ، الولد مسك شيكولاتة وقاله بحبها يا بابا ، قال له طيب حب فيها شوية ورجعها لعمو

5 بخلاء دخلوا محل عصير طلبوا كباية عصير وخمس شفاطات

اتنين بخلاء تراهنوا مين يغطس اطول فترة ممكنة واللى يخرج الأول يعزم التانى على الغدا ، غطسوا الاتنين ولسه ماطلعوش لدلوقتى

بخيل اشترى آلة حاسبة لأولاده حذف منها الصفر علشان مايتكلموش دولى

بخيل شاف واحد بخيل صاحبه متضايق ، قال له متضايق ليه ؟ قال له انكسرت سنة من المشط وعايز اسرح ، قال له ماتعرفش تسرح من غير السنة دى ، قال له طبعا لأنها كانت آخر سنة

بيسألوا بخيل لو الجو بارد تعمل ايه ، قال لهم اقرب من الدفاية ، قالوا له طيب لو زاد البرد شوية ، قال لهم اقرب اكتر ، قالوا طيب لو زاد اكتر ، قال لهم اقرب اكتر ، قالوا طيب لو زاد خالص ، قال لهم اشغل الدفاية

بخيل وقع فى حفرة اتلم الناس حواليه ، كل واحد يمد ايده ويقول له هات ايدك وهو مش بيرد ولا يمد ايده ، بعد كم ساعة واحد صاحبه معدى ، ولما عرف الحكاية قال لهم وسعوا انتم ، مد ايده وقال له خد ايدى

بخيل راكب تاكسى والتاكسى نزل منحدر السواق صرخ وقال مش عارف اوقف العربية ، قال له البخيل طيب وقف العداد بسرعة

زوجة بخيل بعتت ابنها يجيب 3 أرغفة خبز لها ولزوجها وللولد ، الزوج مات طلعت البلكونة قالت لابنها : ابوك مات خليهم رغيفين

بخيل اتعود كل ما يروح مطعم ياخد معاه صراصير يحطها فى الطبق بعد ما يخلص أكل ، واحد صاحبه حب يقلده قاله ادينى صرصار من معاك ، قال له آسف مش معايا غير دبانة علشان الشاى

3 بخلاء اتجمعوا علشان يتبرعوا بفلوس لوجه الله
الأول قال هارسم دايرة واحدف الفلوس فى الهوا اللى فى الدايرة لى واللى بره لوجه الله
التانى قال هارسم خط واللى ييجى على يمين الخط ليه واللى على الشمال لوجه اللله
التالت قال هارمى الفلوس فى الهوا اللى ينزل على الأرض ليه ، واللى يبقى فى الهوا لوجه الله

نكت مدرسين

مدرس بيقول للطلبة : يعيش السمك فى الماء
ردوا : يعيش .. يعيش .. يعيش

مدرس يسأل طالب : استدان ابوك من عمك 100 جنيه ومن جاركم 75 جنيه يبقى هايرد لهم كام ؟
رد قال له : مش هايرد حاجة
قال له واضح انك ماتعرفش حاجة فى الحساب
قال له الطالب انت اللى ماتعرفش ابويا

طفل فى ابتدائى يقول لمدرسته تتجوزينى يا أبلة ؟
قالت له بس انا مش بحب الأولاد الصغيرين
قال لها : أنا كمان مش مستعجل على الأولاد

مدرس يقول للطلبة : اللى شايف نفسه غبى يقف
وقف طالب سأله المدرس : وليه حاسس انك غبى
قال له لا يا أستاذ مش حبيت بس اشوفك واقف لوحدك

نكت مساطيل

صاحبنا مسطول راح لصاحب مطعم مسطول قاله عايز ساندوتش فلافل من غير سلطة خضرا
رد عليه قاله مفيش سلطة خضرا ، أجيب لك من غير سلطة طحينة

مسطول شاور لتاكسى قال له فاضى ؟
قال ايوة
قال له طيب انزل نتكلم شوية

مسطول دخل بقالة وخرج يضحك ، سألوه بتضحك ليه قال لهم عطيته جنيه وما اشتريت شىء

3 فيران بيحششوا ، الأول قال انا السم ما يأثر فيه باستعمله زى السكر أحلى بيه الشاى
الثانى قال : وانا ادخل المصيد ة اكل الجبنة والعب رياضة واخرج
الثالث قال : اسيبكم باضرب القط قلم كل يوم وراجع

كلب مسطول ماشى فى الشارع يقول : نو نو ... لا لا .... صو صو ...لا لا.... هو هو

اتنين مساطيل قاعدين فى الاستاد واحد سأل التانى : تلف الاستاد ده فى قد ايه ؟
قال له فى سيجارتين

مسطول اتصل بنمرة تليفون سأل : محمد موجود ؟؟
قالوا له النمرة غلط
رد عليهم قال : ولما النمرة غلط بتردوا ليه

اخواتنا المساطيل بيتفرجوا على نشرة الأخبار قام واحد قال لصاحبه هيه النشرة مالها طولت كده ؟
قال له تقريبا دى آخر حلقة

نفس الجماعة المساطيل قاعدين فى غرفة لها بابين طلبوا كبريت ، واحد راح يجيب ، دخل من الباب التانى ، سألهم معاكم كبريت ؟
قالوا له استنى بعتنا واحد يجيب وزمانه راجع

اتنين مساطيل قاعدين يحششوا قدام المراية ، شافوا نفسهم فى المراية ، واحد قال للتانى فيه اتنين هناك تيجى نروح لهم
قاموا وقفوا بصوا فى المراية قال طيب خلينا هما جايين

مسطول بيسأل صاحبه اخواتك اسماءهم ايه
رد عليه قال كلهم اسمهم محمود ما عدا على اسمه سعيد

مسطول بيسأل صاحبه هوه النهاردة السبت ولا الأحد
قال له الاتنين
رد قال له ياااااااااااه اول مرة ييجوا مع بعض

مسطول بيقول لصاحبه نتقابل الجمعة ان عشنا وكان لنا عمر
قال له ولو ماعشناش
قال له يبقى نتقابل السبت

مسطول قاعد مع صحابه قال لهم مش أنا طلع لى أسد امبارح
قالوا له وعملت ايه
قال لهم رميته بكوباية مية فى ايدى
رد واحد تانى قال لهم صح
أنا قابلنى نفس الأسد باضربه بالقلم لقيت وشه مبلول

مسطول سمع عن عيد الحب ، راح يسأل بيصلوا العيد فين

مسطول سألوه يعنى ايه حساس بالانجليزى قال لهم سنسيتيف
قالوا له طيب ايه معنى حشاش قال لهم شنشيتيف

مسطول قاعد مع صحابه متضايق ، واحد بيسأله مالك ؟
قاله شكلى اتسطلت مش عارف انا عندى معاد مع واحدة الساعة اتنين ولا معاد مع اتنين الساعة واحدة

مسطول قاعد يقرا اسماء الأموات فى صفحة الوفيات ويقول : يارب يارب مايكون اسمى فيهم

مسطول اتصل على المطافى قال لهم : يعنى احنا لو ما اتصلنا ما تسألوش علنا

مسطول قاعد يتفرج على ماتش لريال مدريد سمع المعلق يقول فاول لصالح رونالدو قال : ياااااااااااااه أول مرة اعرف ان اسمه صالح

اتنين مساطيل راكبين عربية اتقلبت بيهم ، واحد قال للتانى اظن اننا اتقلبنا ، رد عليه قال يووووووووووه بدأنا نوسوس ؟؟

مسطول سواق تاكسى واحدة قالت له عايزة اروح السوق , قال لها روحى بس اوعى تتأخرى

مسطول بيصلى جنب واحد اسمر
الامام قال استووا ، رد قال له كلنا استوينا بس فيه واحد اتحرق

حشاش تاب ورمى الحشيش فى البحر طلعت سمكة تقول : انا حووووووووووووووووووووووت

مسطول قاعد مع واحدة بتقول له انت شجاع ؟
قال لها طبعا
انا من شهداء حرب الخليج

مسطول اتصل بشركة طيران يحجز ، قالوا له ذهاب واياب
قال لهم لا ، خروج المغلوب

مسطول اتصل بشركة طيران يسألهم كم تستغرق الرحلة من القاهرة لجدة ؟
رد الموظف لحظة واحدة
قال له شكرا وقفل السماعة

مسطول بيقولوا له تصور فى الصين عندهم مولود كل دقيقة ، قال لهم صح هوه ده التقدم , مش احنا كل 9 شهور

مسطول ضرب واحد بعربيته , سأله المصاب انت ماشفتنيش
قاله ايوة شفتك
بس مش فاكر فيييييييييييييييين

جماعة مساطيل قاعدين يحششوا واحد قال : تصور يا أخى بنوا الهرم فى 50 سنة
ردواحد ليه ؟؟
قال له كل ما يرصوا حجر البوليس يعمل كبسة

3 طلبة مساطيل اتأخروا عن المدرسة سألهم المدرس ليه اتاخرتم
رد الأول : ضاع منى الخاتم وكنت ادور عليه
والتانى : قال له انا كنت ادور معاه
والتالت : انا كنت دايس على الخاتم

مسطول بينزل من عربيته لقى الدنيا بتمطر قفل الباب ونزل من الباب التانى

بيسألوا مسطول ايه الفرق بين تجارة عين شمس وتجارة الحشيش
قال لهم : تجارة عين شمس 4 سنين انما تجارة الحشيش 25 سنة